🇺🇲 🇮🇱  ABŞ prezidenti Co Bayden iyulun 13-də İsrailə gələrkən‚ birbaşa hava limanında belə bir bəyanat verdi: “İsraillilərlə amerikalılar arasındakı əlaqə kökündən möhkəmdir. Bu, mənim 10-cu səfərimdir. Qədim kökləri olan gözəl bir ölkəyə qayıtmaq üçün hər fürsət bir xeyirdir. Biz ABŞ və İsrail arasında əməkdaşlığı dərinləşdirməyə davam edəcəyik”. Səfərin əsas intriqası  “Yerusəlim bəyannaməsi”nin imzalanmasıdır. Mətbuata sızan məlumatlara əsasən, bu sənədə görə, ABŞ İran da daxil olmaqla, xarici təhlükələrdən İsrailin təhlükəsizliyinin təminatçısı olacaq. 

Yəqin ki, sənəddə hər iki ölkənin İranda nüvə silahının yaranmasının qarşısını almaq istəyi və bu istiqamətdə tədbirlər kompleksi göstəriləcək. Xüsusilə, söhbət mərkəzi Qətərdə olmaqla, Yaxın Şərqdə, o cümlədən İsraildə vahid raketdən müdafiə sisteminin yaradılmasından gedir. Bu sistem artıq qismən işləyir. Məlumdur ki, bir ay əvvəl İrandan İsrail istiqamətində atılan kamikadze pilotsuz uçan aparatlar ələ keçirilib. Biz bəyannamənin bütün təfərrüatlarını, eləcə də onun həyata keçirilməsi üçün konkret tədbirlər kompleksini imzalanma mərasimindən sonra cümə axşamı öyrənəcəyik.  🇺🇸🤝🇮🇱